గణేశకృతరుద్రాధ్యాయస్తుతిః

నమస్తే దేవదేవాయ నమస్తే రుద్రమన్యవే |

నమస్తే చంద్రచూడాయాప్యుతోత ఇషవే నమః || 1||

నమస్తే పార్వతీకాంత ఏకరూపాయ ధన్వనే | 

నమస్తే భగవన్ శంభో బాహుభ్యాముత తే నమః || 2||

ఇషుః శివతమా యా తే తయా మృడయ రుద్ర మామ్ |

శివం ధనుర్యద్బభూవ తేనాపి మృడయాధునా || 3||

శరవ్యా యా శివతమా తయాపి మృడయ ప్రభో |

యా తే రుద్ర శివా నిత్యం సర్వమంగలసాధనం || 4||

తయాఽభిచాకశీహి త్వం తనువా మాముమాపతే |

ఘోరయా తనువాచాపి రుద్రాఽఽద్యాఽపాపకాశినీ || 5|| 

యా తయా మృడయ స్వామిన్ సదా శంతమయా ప్రభో |

గిరిశంత మహారుద్ర హస్తే యామిషుమస్తవే || 6||

విభర్షి తాం గిరిత్రాద్య శివాం కురు శివాపతే |

శివేన వచసా రుద్ర నిత్యం వాచ్ఛా వదామసి || 7||

త్వద్భక్తిపరిపూతాంగం మా హిꣳసీః పురుషం జగత్ |

యచ్ఛ శర్వ జగత్సర్వమయక్ష్మం సుమనా అసత్ || 8||

యథా తథావ మాం రుద్ర తదన్యదపి మే ప్రభో |

రుద్రత్వం ప్రథమో దైవ్యో భిషక్ పాపవినాశకః || 9||

అధివక్తాఽధ్యవోచన్మాం భావలింగార్చకం ముదా |

అహీన్ సర్వాన్ యాతుధాన్యః సర్వా అప్యద్య జంభయన్ || 10||

అసౌ తామ్రోఽరుణో బభ్రుః నీలగ్రీవః సుమంగలః |

విలోహితోఽస్త్యయం శంభో త్వదధిష్ఠానఏవ హి || 11||

నమో నమస్తే భగవన్ నీలగ్రీవాయ మీఢుషే |

సహస్రాక్షాయ శుద్ధాయ సచ్చిదానందమూర్తయే || 12||

ఉభయోరార్త్నియోర్జ్యా యా ధన్వినస్తాం ప్రముంచతామ్ |

సంప్రాప్య ధనురన్యేషాం భయాయ ప్రభవిష్యతి || 13||

అస్మద్భయవినాశార్థమధునా భయదాః ప్రభో |

యాశ్చ తే హస్త ఇషవః పరాతా భగవో వప || 14||

అవతత్య ధనుస్తత్ త్వం సహస్రాక్ష శతేషుధే |

ముఖా నిశీర్య శల్యానాం శివో నః సుమనా భవ || 15||

విజ్యం ధనురిదం భూయాత్ విశల్యో బాణవానపి |

అనేశన్నిషవశ్చాపి హ్యాభురస్తు నిషంగధిః || 16||

కపర్దినో మహేశస్య యది నాభుర్నిషంగధిః |

ఇషవోఽపి సమర్థాశ్చేత్ సామర్థ్యాతు భయం భవేత్ || 17||

యా తే హేతిర్ధనుర్హస్తే మీఢుష్టమ బభూవ యా |

తయాఽస్మాన్ విశ్వతస్తేన పాలయ త్వమయక్ష్మయా || 18||

అనాతతాయాయుధాయ నమస్తే ధృష్ణవే నమః |

బాహుభ్యాం ధన్వనే శంభో నమో భూయో నమో నమః || 19||

పరితే ధన్వనో హేతిః విశ్వతోఽస్మాన్ వృణక్తు నః |

ఇషుధిస్తవ యస్తావత్ అస్మదారే నిధేహి తమ్ || 20||

హిరణ్యబాహవే తుభ్యం సేనాన్యే తే నమో నమః |

దిశాం చ పతయే తుభ్యం పశూనాం పతయే నమః || 21||

త్విషీమతే నమస్తుభ్యం నమః సస్పింజరాయ తే |

నమః పథీనాం పతయే బభ్రుశాయ నమో నమః || 22||

నమో వివ్యాధినేన్నానాం పతయే ప్రభవే నమః |

నమస్తే హరికేశాయ రుద్రాయాస్తూపవీతినే || 23||

పుష్టానాం పతయే తుభ్యం జగతాం పతయే నమః |

సంసారహేతిరూపాయ రుద్రాయాప్యాతతాయినే || 24||

క్షేత్రాణాం పతయే తుభ్యం సూతాయ సుకృతాత్మనే |

అహంత్యాయ నమస్తుభ్యం వనానాం పతయే నమః || 25||

రోహితాయ స్థపతయే మంత్రిణే వాణిజాయ చ |

కక్షాణాం పతయే తుభ్యం నమస్తుభ్యం భువంతయే || 26||

తద్వారివస్కృతాయాస్తు మహాదేవాయ తే నమః |

ఓషధీనాం చ పతయే నమస్తుభ్యం మహాత్మనే || 27||

ఉచ్చైర్ఘోషాయ ధీరాయ ధీరాన్ క్రందయతే నమః |

పత్తీనాం పతయే తుభ్యం కృత్స్నవీతాయ తే నమః || 28||

ధావతే ధవలాయాపి సత్త్వనాం పతయే నమః |

నమస్తే సహమానాయ తుభ్యం నివ్యాధినే నమః || 29||

ఆవ్యాధినీనాం పతయే కకుభాయ నిషంగిణే |

స్తేనానాం పతయే తుభ్యం దివ్యేషుధిమతే నమః || 30||

తస్కరాణాం చ పతయే వంచతే పరివంచతే |

స్తాయూనాం పతయే తుభ్యం నమస్తేఽస్తు నిచేరవే || 31||

నమః పరిచరాయాపి మహారుద్రాయ తే నమః |

అరణ్యానాం చ పతయే ముష్ణతాం పతయే నమః || 32||

ఉష్ణీపిణే నమస్తుభ్యం నమో గిరిచరాయ తే |

కులుంచానాం చ పతయే నమస్తుభ్యం భవాయ చ || 33||

నమో రుద్రాయ శర్వాయ తుభ్యం పశుపతే నమః |

నమ ఉగ్రాయ భీమాయ నమో అగ్రేవధాయ చ || 34||

నమో దూరేవధాయాపి నమో హంత్రే నమో నమః |

హనీయసే నమస్తుభ్యం నీలగ్రీవాయ తే నమః || 35||

నమస్తే శితికంఠాయ నమస్తేఽస్తు కపర్దినే |

నమస్తే వ్యుప్తకేశాయ సహస్రాక్షాయ మీఢుషే || 36||

గిరిశాయ నమస్తేఽస్తు శిపివిష్టాయ తే నమః |

నమస్తే శంభవే తుభ్యం మయోభవ నమోఽస్తు తే || 37||

మయస్కర నమస్తుభ్యం శంకరాయ నమో నమః |

నమః శివాయ శర్వాయ నమః శివతరాయ చ || 38||

నమస్తీర్థ్యాయ కూల్యాయ నమః పార్యాయ తే నమః |

అవార్యాయ నమస్తేస్తు నమః ప్రతరణాయ చ || 39||

నమ ఉత్తరణాయాపి హరాతార్యాయ తే నమః |

అలాద్యాయ నమస్తేఽస్తు భక్తానాం వరదాయ చ || 40||

నమః శష్ప్యాయ ఫేన్యాయ సికత్యాయ నమో నమః |

ప్రవాహ్యాయ నమస్తేఽస్తు హ్ర్స్వాయాస్తు నమో నమః || 41||

వామనాయ నమస్తేఽస్తు నమోఽస్తు బృహతే నమః |

వర్షీయసే నమస్తేఽస్తు నమో వృద్ధాయ తే నమః || 42||

సంవృధ్వనే నమస్తుభ్యమగ్రియాయ నమో నమః |

ప్రథమాయ నమస్తుభ్యమాశవే చాజిరాయ చ || 43||

శీఘ్రియాయ నమస్తేఽస్తు శీభ్యాయ చ నమో నమః |

నమ ఊర్వ్యాయ శర్వాయాప్యవస్వన్యాయ తే నమః || 44||

స్రోతస్యాయ నమస్తుభ్యం ద్వీప్యాయ చ నమో నమః |

జ్యేష్ఠాయ చ నమస్తుభ్యం కనిష్ఠాయ నమో నమః || 45||

పూర్వజాయ నమస్తుభ్యం నమోఽస్త్వపరజాయ చ |

మధ్యమాయ నమస్తుభ్యమపగల్భాయ తే నమః || 46||

జఘన్యాయ నమస్తుభ్యం బుధ్నియాయ నమో నమః |

సోభ్యాయ ప్రతిసర్యాయ తే యామ్యాయ నమో నమః || 47||

క్షేమ్యాయ చ నమస్తుభ్యం యామ్యాయ చ నమో నమః |

ఉర్వర్యాయ నమస్తుభ్యం ఖల్యాయ చ నమో నమః || 48||

శ్లోక్యాయ చావసాన్యాయావస్వన్యాయ చ తే నమః |

నమో వన్యాయ కక్ష్యాయ మౌన్జ్యాయ చ నమో నమః || 49||

శ్రవాయ చ నమస్తుభ్యం ప్రతిశ్రవ నమో నమః |

ఆశుషేణాయ శూరాయ నమోఽస్త్వాశురథాయ చ || 50||

వరూథినే వర్మిణే చ బిల్మినే చ నమో నమః |

శ్రుతాయ శ్రుతసేనాయ నమః కవచినే నమః || 51||

దుందుభ్యాయ నమస్తుభ్యమాహనన్యాయ తే నమః |

ప్రహితాయ నమస్తుభ్యం ధృష్ణవే ప్రమృశాయ చ || 52||

పారాయ పారవిందాయ నమస్తీక్ష్ణేషవే నమః |

సుధన్వనే నమస్తుభ్యం స్వాయుధాయ నమో నమః || 53||

నమః స్రుత్యాయ పథ్యాయ నమః కాట్యాయ తే నమః |

నమో నీప్యాయ సూద్యాయ సరస్యాయ చ తే నమః || 54||

అవర్ష్యాయ చ వర్ష్యాయ మేఘ్యాయ చ నమో నమః |

విద్యుత్యాయ నమస్తుభ్యమీధ్రియాయ నమో నమః || 55||

నమో నాద్యాయ భవ్యాయ వైశంతాయ నమో నమః |

అవట్యాయ నమస్తుభ్యం నమః కూప్యాయ తే నమః || 56||

ఆతప్యాయ నమస్తుభ్యం వాత్యాయ చ నమో నమః |

రేష్మియాయ నమస్తుభ్యం వాస్తవ్యాయ చ తే నమః || 57||

వాస్తుపాయ నమస్తుభ్యం నమస్సోమాయ తే నమః |

నమో రుద్రాయ తామ్రాయప్యరుణాయ చ తే నమః || 58||

నమ ఉగ్రాయ భీమాయ నమః శంగాయ తే నమః |

నమస్తీర్థ్యాయ కూల్యాయ సికత్యాయ నమో నమః || 59||

ప్రవాహ్యాయ నమస్తుభ్యమిరిణ్యాయ నమో నమః |

నమస్తే చంద్రచూడాయ ప్రపథ్యాయ నమో నమః || 60||

కిꣳశిలాయ నమస్తేఽస్తు క్షయణాయ చ తే నమః |

కపర్దినే నమస్తేఽస్తు నమస్తేఽస్తు పులస్తయే || 61||

నమో గోష్ఠ్యాయ గృహ్యాయ గ్రహాణాం పతయే నమః |

నమస్తల్ప్యాయ గేహ్యాయ గుహావాసాయ తే నమః || 62||

కాట్యాయ గహ్వరేష్ఠాయ హృదయ్యాయ చ తే నమః |

నివేష్ప్యాయ నమస్తుభ్యం పాꣳసవ్యాయ తే నమః || 63||

రజస్యాయ నమస్తుభ్యం పరాత్పరతరాయ చ |

నమస్తే హరికేశాయ శుష్క్యాయ చ నమో నమః || 64||

హరిత్యాయ నమస్తుభ్యం హరిద్వర్ణాయ తే నమః |

నమ ఊర్వ్యాయ సూర్మ్యాయ పర్ణ్యాయ చ నమో నమః || 65||

నమోఽపగురమాణాయ పర్ణశద్యాయ తే నమః |

అభిఘ్నతే చాఖ్ఖిదతే నమః ప్రఖ్ఖిదతే నమః || 66||

విశ్వరూపాయ విశ్వాయ విశ్వాధారాయ తే నమః |

త్ర్యంబకాయ చ రుద్రాయ గిరిజాపతయే నమః || 67||

మణికోటీరకోటిస్థకాంతిదీప్తాయ తే నమః |

వేదవేదాంతవేద్యాయ వృషారూఢాయ తే నమః || 68||

అవిజ్ఞేయస్వరూపాయ సుందరాయ నమో నమః |

ఉమాకాంత నమస్తేఽస్తు నమస్తే సర్వసాక్షిణే || 69||

హిరణ్యబాహవే తుభ్యం హిరణ్యాభరణాయ చ |

నమో హిరణ్యరూపాయ రూపాతీతాయ తే నమః || 70||

హిరణ్యపతయే తుభ్యమంబికాపతయే నమః |

ఉమాయాః పతయే తుభ్యం నమః పాపప్రణాశక || 71||

మీఢుష్టమాయ దుర్గాయ కద్రుద్రాయ ప్రచేతసే |

తథ్యసే బిల్వపూజ్యాయ నమః కల్యాణరూపిణే || 72||

అపారకళ్యాణగుణార్ణవాయ శ్రీనీలకంఠాయ నిరంజనాయ |

కాలాంతకాయాపి నమో నమస్తే దిక్కాలరూపాయ నమో నమస్తే || 73||

వేదాంతవందిస్తుతసద్గుణాయ గుణప్రవీణాయ గుణాశ్రయాయ |

శ్రీవిశ్వనాథాయ నమో నమస్తే కాశీనివాసాయ నమో నమస్తే || 74||

అమేయసౌందర్యసుధానిధానసమృద్ధిరూపాయ నమో నమస్తే |

ధారాధరాకార నమో నమస్తే ధారాస్వరూపాయ నమో నమస్తే || 75||

నీహారతారాకరకాకరాయ ప్రకారహారప్రతిహారవీర |

వీరేశ్వర అపారదయానిధాన పాహి ప్రభో పాహి నమో నమస్తే || 76||

|| ఇతి శివరహస్యాంతర్గతే గణేశకృతరుద్రాధ్యాయస్తుతిః సంపూర్ణా ||