శ్రీరుద్రనమకస్తోత్రమ్

శ్రీగణేశకృత శ్లోకాత్మక రుద్రాధ్యాయః

ధ్యానం · గణేశ ఉవాచ (౭౬ శ్లోకాలు) · వ్యాస ఉవాచ

ధ్యానమ్

ఆపాతాళ నభస్స్థలాంత భువన బ్రహ్మాండ మావిస్ఫుర

జ్జ్యోతిఃస్ఫాటికలింగ మౌళివిలసత్ పూర్ణేందు వాంతామృతైః ।

అస్తోకాప్లుతమేకమీశమనిశం రుద్రానువాకాన్ జపన్

ధ్యాయేదీప్సితసిద్ధయే ధ్రువపదం విప్రోఽభిషించేచ్ఛివమ్ ॥

బ్రహ్మాండవ్యాప్తదేహా భసితహిమరుచా భాసమానా భుజంగైః

కంఠే కాలాః కపర్దాః కలితశశికలాశ్చండకోదండహస్తాః ।

త్ర్యక్షా రుద్రాక్షమాలాః సులలితవపుషః శాంభవా మూర్తిభేదాః

రుద్రాః శ్రీరుద్రసూక్తప్రకటితవిభవా నః ప్రయచ్ఛంతు సౌఖ్యమ్ ॥

గణేశ ఉవాచ

నమస్తే దేవదేవాయ నమస్తే రుద్ర మన్యవే ।

నమస్తే చంద్రచూడాయా ప్యుతోత ఇషవే నమః ॥ 1 ॥

నమస్తే పార్వతీకాంతాయైకరూపాయ ధన్వనే ।

నమస్తే భగవన్ శంభో బాహుభ్యాముత తే నమః ॥ 2 ॥

ఇషుః శివతమా యా తే తయా మృడయ రుద్ర మామ్ ।

శివం ధనుర్యద్బభూవ తేనాపి మృడయాఽధునా ॥ 3 ॥

శరవ్యా యా శివతమా తయాపి మృడయ ప్రభో ।

యా తే రుద్ర శివా నిత్యం సర్వమంగలసాధనీ ॥ 4 ॥

తయాఽభిచాకశీహి త్వం తనువా మా ముమాపతే ।

ఘోరయా తనువా చాపి రుద్రాఽద్యాఽపాపకాశినీ ॥ 5 ॥

యా తయా మృడయ స్వామిన్ సదా శంతమయా ప్రభో ।

గిరిశంత మహారుద్ర హస్తే యామిషు మస్తవే ॥ 6 ॥

బిభర్షి తాం గిరిత్రాద్య శివాం కురు శివాపతే ।

శివేన వచసా రుద్ర నిత్యం వాచా వదామసి ॥ 7 ॥

త్వద్భక్తి పరిపూతాంగం మా హింసీః పురుషం జగత్ ।

యచ్చ శర్వ జగత్సర్వ మయక్ష్మం సుమనా అసత్ ॥ 8 ॥

యథా తథాఽవమాం రుద్ర తదన్యధాపి మే ప్రభో ।

రుద్ర త్వం ప్రథమో దైవ్యో భిషక్ పాపవినాశకః ॥ 9 ॥

అధివక్తాఽధ్యవోచ న్మాం భావలింగార్చకం ముదా ।

అహీన్ సర్వాన్ యాతుధాన్యః సర్వా అప్యద్య జంభయన్ ॥ 10 ॥

అసౌ తామ్రోఽరుణో బభ్రుః నీలగ్రీవ స్సుమంగలః ।

విలోహితోఽస్త్వయం శంభో త్వదధిష్ఠాన ఏవ హి ॥ 11 ॥

నమో నమస్తే భగవన్ నీలగ్రీవాయ మీఢుషే ।

సహస్రాక్షాయ శుద్ధాయ సచ్చిదానందమూర్తయే ॥ 12 ॥

ఉభయో రార్త్నియోర్జ్యా యా ధన్వన స్తాం ప్రముంచతామ్ ।

సంప్రాప్య ధనురన్యేషాం భయాయ ప్రభవిష్యతి ॥ 13 ॥

అస్మద్భయవినాశార్థ మధునాఽభయద ప్రభో ।

యాశ్చ తే హస్త ఇషవః పరా తా భగవో వప ॥ 14 ॥

అవతత్య ధనుశ్చ త్వం సహస్రాక్ష శతేషుధే ।

ముఖా నిశీర్య శల్యానాం శివో నః సుమనా భవ ॥ 15 ॥

విజ్యం ధనురిదం భూయాత్ విశల్యో బాణవానపి ।

అనేశ న్నిషవ శ్చాపి హ్యాభురస్తు నిషంగథిః ॥ 16 ॥

కపర్దినో మహేశస్య యది నాభుర్నిషంగథిః ।

ఇషవోఽపి సమర్థాశ్చేత్ సామర్థ్యే తు భయం భవేత్ ॥ 17 ॥

యా తే హేతిర్ధనుర్హస్తే మీఢుష్టమ బభూవ యా ।

తయాఽస్మాన్ విశ్వత స్త్వ మయక్ష్మయా పాలయ ప్రభో ॥ 18 ॥

అనాతతాయాయుధాయ నమస్తే ధృష్ణవే నమః ।

బాహుభ్యాం ధన్వనే శంభో నమో భూయో నమో నమః ॥ 19 ॥

పరి తే ధన్వనో హేతిః విశ్వతోఽస్మాన్ వృణక్తు నః ।

ఇషుధిస్తవ యస్తావదస్మదారే నిధేహి తమ్ ॥ 20 ॥

హిరణ్యబాహవే తుభ్యం సేనాన్యే తే నమో నమః ।

దిశాం చ పతయే తుభ్యం పశూనాం పతయే నమః ॥ 21 ॥

త్విషీమతే నమస్తుభ్యం నమ స్సస్పింజరాయ తే ।

నమః పథీనాం పతయే బభ్లుశాయ నమో నమః ॥ 22 ॥

నమో వివ్యాధినేఽన్నానాం పతయే ప్రభవే నమః ।

నమస్తే హరికేశాయ రుద్రాయా స్తూపవీతినే ॥ 23 ॥

పుష్టానాం పతయే తుభ్యం జగతాం పతయే నమః ।

సంసారహేతి రూపాయ రుద్రాయాఽప్యాతతావినే ॥ 24 ॥

క్షేత్రాణాం పతయే తుభ్యం సూతాయ సుకృతాత్మనే ।

అహంత్యాయ నమస్తుభ్యం వనానాం పతయే నమః ॥ 25 ॥

రోహితాయ స్థపతయే మంత్రిణే వాణిజాయ చ ।

కక్షాణాం పతయే తుభ్యం నమస్తుభ్యం భువంతయే ॥ 26 ॥

తద్వారివస్కృతాయాస్తు మహాదేవాయ తే నమః ।

ఓషధీనాం చ పతయే నమస్తుభ్యం మహాత్మనే ॥ 27 ॥

ఉచ్చైర్ఘోషాయ ధీరాయ ధీరాన్ క్రందయతే నమః ।

పత్తీనాం పతయే తుభ్యం కృత్స్నవీతాయ తే నమః ॥ 28 ॥

ధావతే ధవలాయాపి సత్త్వనాం పతయే నమః ।

నమస్తే సహమానాయ తుభ్యం నివ్యాధినే నమః ॥ 29 ॥

ఆవ్యాధినీనాం పతయే కకుభాయ నిషంగిణే ।

స్తేనానాం పతయే తుభ్యం దివ్యేషుధిమతే నమః ॥ 30 ॥

తస్కరాణాం చ పతయే వంచతే పరివంచతే ।

స్తాయూనాం పతయే తుభ్యం నమస్తేఽస్తు నిచేరవే ॥ 31 ॥

నమః పరిచరాయాపి మహారుద్రాయ తే నమః ।

అరణ్యానాం చ పతయే ముష్ణతాం పతయే నమః ॥ 32 ॥

ఉష్ణీషిణే నమస్తుభ్యం నమో గిరిచరాయ తే ।

కులుంచానాం చ పతయే నమస్తుభ్యం భవాయ చ ॥ 33 ॥

నమో రుద్రాయ శర్వాయ తుభ్యం పశుపతే నమః ।

నమ ఉగ్రాయ భీమాయ నమ శ్చాగ్రేవధాయ చ ॥ 34 ॥

నమో దూరేవధాయాపి నమో హంత్రే నమో నమః ।

హనీయసే నమస్తుభ్యం నీలగ్రీవాయ తే నమః ॥ 35 ॥

నమస్తే శితికంఠాయ నమస్తేఽస్తు కపర్దినే ।

నమస్తే వ్యుప్తకేశాయ సహస్రాక్షాయ మీఢుషే ॥ 36 ॥

గిరిశాయ నమస్తేఽస్తు శిపివిష్టాయ తే నమః ।

నమస్తే శంభవే తుభ్యం మయోభవ నమోఽస్తు తే ॥ 37 ॥

మయస్కర నమస్తుభ్యం శంకరాయ నమో నమః ।

నమశ్శివాయ శర్వాయ నమశ్శివతరాయ చ ॥ 38 ॥

నమస్తీర్థ్యాయ కూల్యాయ నమః పార్యాయ తే నమః ।

అవార్యాయ నమస్తేఽస్తు నమః ప్రతరణాయ చ ॥ 39 ॥

నమ ఉత్తరణాయాపి హరాతార్యాయ తే నమః ।

ఆలాద్యాయ నమస్తేఽస్తు భక్తానాం వరదాయ చ ॥ 40 ॥

నమ శ్శష్ప్యాయ ఫేన్యాయ సికత్యాయ నమో నమః ।

ప్రవాహ్యాయ నమస్తేఽస్తు హ్రస్వాయాస్తు నమో నమః ॥ 41 ॥

వామనాయ నమస్తేఽస్తు బృహతే చ నమో నమః ।

వర్షీయసే నమస్తేఽస్తు నమో వృద్ధాయ తే నమః ॥ 42 ॥

సంవృధ్వనే నమస్తుభ్యం అగ్రియాయ నమో నమః ।

ప్రథమాయ నమస్తుభ్యం ఆశవే చాజిరాయ చ ॥ 43 ॥

శీఘ్రియాయ నమస్తేఽస్తు శీభ్యాయ చ నమో నమః ।

నమ ఊర్మ్యాయ శర్వాయాఽప్యవస్వన్యాయ తే నమః ॥ 44 ॥

స్రోతస్యాయ నమస్తుభ్యం ద్వీప్యాయ చ నమో నమః ।

జ్యేష్ఠాయ చ నమస్తుభ్యం కనిష్ఠాయ నమో నమః ॥ 45 ॥

పూర్వజాయ నమస్తుభ్యం నమోఽస్త్వపరజాయ చ ।

మధ్యమాయ నమస్తుభ్యం అపగల్భాయ తే నమః ॥ 46 ॥

జఘన్యాయ నమస్తుభ్యం బుధ్నియాయ నమో నమః ।

సోభ్యాయ ప్రతిసర్యాయ తే యామ్యాయ చ నమో నమః ॥ 47 ॥

క్షేమ్యాయ చ నమస్తుభ్యం యామ్యాయ చ నమో నమః ।

ఉర్వర్యాయ నమస్తుభ్యం ఖల్యాయ చ నమో నమః ॥ 48 ॥

శ్లోక్యాయ చావసాన్యాయాఽవస్వన్యాయ చ తే నమః ।

నమో వన్యాయ కక్ష్యాయ మౌంజ్యాయ చ నమో నమః ॥ 49 ॥

శ్రవాయ చ నమస్తుభ్యం ప్రతిశ్రవాయ తే నమః ।

ఆశుషేణాయ శూరాయ నమోఽస్త్వాశురథాయ చ ॥ 50 ॥

వరూథినే వర్మిణే చ బిల్మినే చ నమో నమః ।

శ్రుతాయ శ్రుతసేనాయ నమః కవచినే నమః ॥ 51 ॥

దుందుభ్యాయ నమస్తుభ్యం ఆహనన్యాయ తే నమః ।

ప్రహితాయ నమస్తుభ్యం ధృష్ణవే ప్రమృశాయ చ ॥ 52 ॥

నిషంగిణే చేషుధిమతే తీక్ష్ణేషవే తే నమః ।

ఆయుధినే నమస్తుభ్యం స్వాయుధాయ సుధన్వనే ॥ 53 ॥

నమః స్రుత్యాయ పథ్యాయ నమః కాట్యాయ తే నమః ।

నమో నీప్యాయ సూద్యాయ సరస్యాయ చ తే నమః ॥ 54 ॥

నమో నాద్యాయ భవ్యాయ వైశంతాయ నమో నమః ।

అవట్యాయ నమస్తుభ్యం నమః కూప్యాయ తే నమః ॥ 55 ॥

అవర్ష్యాయ చ వర్ష్యాయ మేఘ్యాయ చ నమో నమః ।

విద్యుత్యాయ నమస్తుభ్య మీధ్రియాయ నమో నమః ॥ 56 ॥

ఆతప్యాయ నమస్తుభ్యం వాత్యాయ చ నమో నమః ।

రేష్మియాయ నమస్తుభ్యం వాస్తవ్యాయ చ తే నమః ॥ 57 ॥

వాస్తుపాయ నమస్తుభ్యం నమస్సోమాయ తే నమః ।

నమో రుద్రాయ తామ్రాయాప్యరుణాయ చ తే నమః ॥ 58 ॥

నమ ఉగ్రాయ భీమాయ నమ శ్శంగాయ తే నమః ।

నమస్తీర్థ్యాయ కూల్యాయ సికత్యాయ నమో నమః ॥ 59 ॥

ప్రవాహ్యాయ నమస్తుభ్య మిరిణ్యాయ నమో నమః ।

నమస్తే చంద్రచూడాయ ప్రపథ్యాయ నమో నమః ॥ 60 ॥

కింశిలాయ నమస్తేఽస్తు క్షయణాయ చ తే నమః ।

కపర్దినే నమస్తేఽస్తు నమస్తేఽస్తు పులస్తయే ॥ 61 ॥

నమో గోష్ఠ్యాయ గృహ్యాయ గృహాణాం పతయే నమః ।

నమస్తల్ప్యాయ గేహ్యాయ గుహావాసాయ తే నమః ॥ 62 ॥

కాట్యాయ గహ్వరేష్ఠాయ హృదయ్యాయ చ తే నమః ।

నివేష్ప్యాయ నమస్తుభ్యం పాంసవ్యాయ తే నమః ॥ 63 ॥

రజస్యాయ నమస్తుభ్యం పరాత్పరతరాయ చ ।

నమస్తే హరికేశాయ శుష్క్యాయ చ నమో నమః ॥ 64 ॥

హరిత్యాయ నమస్తుభ్యం హరిద్వర్ణాయ తే నమః ।

నమ ఊర్వ్యాయ సూర్మ్యాయ పర్ణ్యాయ చ నమో నమః ॥ 65 ॥

నమోఽపగురమాణాయ పర్ణశద్యాయ తే నమః ।

అభిఘ్నతే చాఖ్ఖిదతే నమః ప్రఖ్ఖిదతే నమః ॥ 66 ॥

విశ్వరూపాయ విశ్వాయ విశ్వాధారాయ తే నమః ।

త్ర్యంబకాయ చ రుద్రాయ గిరిజాపతయే నమః ॥ 67 ॥

మణికోటీరకోటిస్థ కాంతిదీప్తాయ తే నమః ।

వేదవేదాంతవేద్యాయ వృషారూఢాయ తే నమః ॥ 68 ॥

అవిజ్ఞేయస్వరూపాయ సుందరాయ నమో నమః ।

ఉమాకాంత నమస్తేఽస్తు నమస్తే సర్వసాక్షిణే ॥ 69 ॥

హిరణ్యబాహవే తుభ్యం హిరణ్యాభరణాయ చ ।

నమో హిరణ్యరూపాయ రూపాతీతాయ తే నమః ॥ 70 ॥

హిరణ్యపతయే తుభ్య మంబికాపతయే నమః ।

ఉమాయాః పతయే తుభ్యం నమః పాపప్రణాశక ॥ 71 ॥

మీఢుష్టమాయ దుర్గాయ కద్రుద్రాయ ప్రచేతసే ।

తవ్యసే బిల్వపూజ్యాయ నమః కల్యాణరూపిణే ॥ 72 ॥

అపారకల్యాణగుణార్ణవాయ శ్రీనీలకంఠాయ నిరంజనాయ ।

కాలాంతకాయాపి నమో నమస్తే దిక్కాలరూపాయ నమో నమస్తే ॥ 73 ॥

వేదాంతబృందస్తుత సద్గుణాయ గుణప్రవీణాయ గుణాశ్రయాయ ।

శ్రీవిశ్వనాథాయ నమో నమస్తే కాశీనివాసాయ నమో నమస్తే ॥ 74 ॥

అమేయసౌందర్య సుధానిధాన సమృద్ధిరూపాయ నమో నమస్తే ।

ధరాధరాకార నమో నమస్తే ధారాస్వరూపాయ నమో నమస్తే ॥ 75 ॥

నీహారతారాకరకాంతిధారిన్ ప్రకాశహారప్రతిహారవీర ।

వీరేశ్వరాఽపార దయానిధాన పాహి ప్రభో పాహి నమో నమస్తే ॥ 76 ॥

వ్యాస ఉవాచ

ఏవం స్తుత్వా మహాదేవం ప్రణిపత్య పునఃపునః ।

కృతాంజలిపుటస్తస్థౌ పార్శ్వే డుంఠివినాయకః ॥

తమాలోక్య సుతం ప్రాప్తం వేదవేదాంగపారగమ్ ।

స్నేహాశ్రుధారాసంవీతః ప్రాహ డుంఠిం సదాశివః ॥

ఇతి శ్రీగణేశకృతశ్లోకాత్మకరుద్రాధ్యాయపారాయణేన శ్రీవిశ్వేశ్వరః సుప్రీతః సుప్రసన్నో వరదో భవతు ॥