దేవతలందరకూ ఆహుతులను అందించేవాడు గాన అగ్నిదేవునకు “హుతవహుడు” అని పేరు. అట్లే  ‘అగ్నిముఖాః వై దేవాః’ అనెడి ఉక్తి ద్వారా దేవతలకు అగ్నిముఖులు అనగా అగ్నినే ముఖముగా కలిగినవారు అనే ప్రసిద్ధి కలిగినది.  

సనాతన ధర్మమునందు అగ్ని ఆరాధనకి ఎనలేని ప్రాశస్త్యం కలదు.యజ్ఞ,యాగాదులు చేయటం ద్వారా మానవుని యొక్క సమస్త ఈప్సితములు నేరవేరటమే కాక,ప్రపంచము నందు శాంతి,సౌఖ్యము నెలకొంటాయి.

అటువంటి ఫలితములను పొందాలి అంటే,మనము చేసే ఆరాధన పరిపుష్టముగా,వేదవిహితముగా ఉండాలి.ఈ మధ్య కాలములో చండి హోమములు,గణపతి హోమములు,రుద్ర హోమములు మరియు ఇతర అగ్ని కార్యక్రమములు అనేక చోట్ల చేయబడుతున్నవి.అగ్ని ముఖంగానే దేవతలు హవిస్సులను స్వీకరించి మనని అనుగ్రహిస్తారు.అందుచేత యజ్ఞమునందైన,యాగమునందైనా అగ్ని సంస్కరణం ఎంతో ముఖ్యమైనది.